ذوي الإحتياجات الخاصة...عبارة بتعني انّو شخص في إشيا ما بيقدر يعملها وحدو و هالإشيا هيّي الحاجة الخاصّة اللي إلو. في ناس حاجتن بتخلق معن و في ناس بس يكبرو بتصير عندن لعدّة اسباب.
يمكن اللي بتخلق معو عندو وقت هوّي و اللي حَولو يعتبروها عاديّة و يتعلّمو يعيشو معها بس تخايلو مثلا حدا كان انسان طبيعي و فجأة بيصير عندو مشكلة ما بقا بيشوف منيح، كيف هالشخص اللي خلق و عاش بالنور بدّو فجأة يتعوّد عالعتمة!؟
كيف حدا كان عادي و بسبب حادث ما بقا يمشي بدّو يتعوّد انّو بدّو مساعدة تا يتنقّل و انّو صار حمل عا غيرو؟!
كيف اللي كان يحكي عادي و ما بقا يقدر بدّو يقنع حالو انّو لازم يفتّش عا طريقة تعبير و تواصل تانية؟!
يا رب انت اللي شفيت العميان و المخلع و الأبرص و غيرن بتعرف قدّيش صعب عليهن هالشي!
منطلب منّك يا رب نعمة الصحّة لكل الناس و خصوصا لذوي الإحتياجات الخاصة و للي بيهتمّو فيهن...اغمرن برحمة قلبك الحنون.
#شربل سكران بألله
