لكل يوم زوّادة:
من اصعب الإشيا انّو الواحد ما يقدر يتنفّس قدّيش مهمّ هالنفس، قدّيش مهمّ الأوكسيجين لجسم الإنسان تا يعيش! و من ميلة تانية لمّا نكون كتير زعلانين منعبّر و منقول: مخنوقين بدنا نتنفّس... يا ربّ نحنا كل يوم عم نختنق ل١٠٠ سبب و سبب. بهيك وقت صعب ما فينا ما نتذكّر قول القدّيس بيو: "الصلا اوكسيجين الروح."
تعو كلنا نتوحّد بالصلا عا نوايا بعضنا، عالكترة الصلا اقوى و بتوصل للسما اسرع! منخصّ بالذكر المرضى اللي مش ملاقيين دوا، اللي عتلانين هم يفوتو عالمستشفى، اللي تعبو من الوجع... منصلّي كمان عا نيّة كل شخص تعبان و جوعان و بردان و عاطل عن العمل و خيفان... يا رب انفخ فينا نفس جديد متل اوّل يوم خلقت الإنسان و نفخت فيه الروح...يا رب نحنا منتنفّس معك... يا ابن داود ارحمنا!
#شربل سكران بألله
