لكل يوم زوّادة:
٤ آب ٢٠٢٠...وقف الزمن بلبنان، الوقت من بعد هاليوم مش محسوب! باللّحظة اللي طلع فيها الإنفجار وقّفت الأرض تبرُم و انفتحِت بواب السما تا تستقبِل وفود اطفال و شباب و صبايا و كبار بالعمر من كل المناطق ما عرفوا و لا نحنا عرفنا لهلق ليش راحوا و مين اخدُن منا... اكيد هنّي حلوين لدرجة السما بتلبقلُن اكتر من ارض مش عارفة قيمِتهن.. هونيك الفرحة فيهن كبيرة بس هون الدموع ما نشفِت لأنّن فلّوا بدون انذار، ما لحّقوا يودّعوا حدا! ناس اختفِت، ناس انجرحِت بجسمها و بقلبها، ناس تهجّرت من بيوتها، بواب رزق تهدّمِت، احلام تكسّرِت...ليش؟ كرمال مين؟ اسئلة كتيرة بعدها بلا اجوبة بس اللّي كلنا اكيدين منّو انو لو ضاعِت عدالة الأرض بزواريب المصالِح، عدالة السما جايي و مع ربنا ما بيضيع حقّ حدا... يا رب اغمرُن بحُبّك و رحمتك و عطينا نصبُر عا رجا القيامة...آمين
#شربل سكران بألله
