لكل يوم زوّادة:
بتعرف يا رب، اوقات بتطلّع حواليّي و بشوف اشيا كتير غريبة. ناس بتعمل المستحيل كرمال تؤمّن حاجات عَيلتها و ناس ما بتحكي مع اهلها و اخواتها. ناس عم تبكي عا اهلها تركوا هالأرض و ناس بيزورو اهلن مرّة بالسنة. ناس بتضحّي كتير كرمال غيرها و ناس انانيّة ما بتشوف الّا حالها لَو عا حساب غيرها. ناس بتحكي الحقيقة لو شو ما صار و ناس بتكذب متل ما بتتنفّس. ناس بتكتب عنّك و ما بتطبِّق شي من اللي بتكتبو بحياتها و ناس معك بتكتب قصّة حياتها...
مع كل هالتناقضات حولي و فيّي، انا ضايع يا رب، شو الصحّ، شو الغلط؟ علّمني ما احكم عا حدا و اعطيني إفهم انّك انت الأساس و الباقي تفاصيل، و ضلّك ذكّرني إنّو فيّي إحكيك أنا و اكيد إنّك ما رح تحكم عليّي!سامحني اذا شي يوم استحيت فيك و اليوم بس بدّي قلّك قدّام كل الناس إني بحبّك!
#شربل سكران بألله
