زوادة اليوم 15 كانون الثاني 2022
14Jan
يسوع الملك
بيخبرو عن شب حالتو غريبة و نادرة، ما بيقدر ينسى!
بيتذكّر كل شي من طفولتو و كل لحظة بحياتو!
منكن رح يقول: كتير حلو نيّالو، نحنا مننسى إشيا كتير مهمّة بحياتنا، يمكن عيد ميلاد حدا منحبّو، يمكن إجتماع شغل مهمّ، يمكن معلومة مهمّة، يمكن موعد دوا...
و هالنسيان رح يؤثّر عالنتيجة اللي بدنا ياها بطريقة مش منيحة.
و بالمقابل كتار رح يقولو حرام كيف فيه يعيش هيك!
في مواقف بشعة، و إشيا جرحتنا، و كلمات زعّلتنا، و خيانة إذيتنا و رفض حسّسنا إننا مش مناح كفاية...
كل هالإشيا إذا تراكمت جوّاتنا و ما نسيناها شو بيصير فينا!
إنتو شو رأيكن؟
عا كل حال، بالمختصر الذاكرة و النسيان تنيناتن نِعَم من ربنا تا نقدر نعيش!
إعرفوا تستعملوهن!
يا رب كون بوصلة إلنا، ذكّرنا فيك عا طول و نسّينا هالأرض و إنت تذكّر حسناتنا و إنسى خطايانا و سامحنا، منّك يا رب منطلب!
تعليقات
